Teks Khutbah Jumat Singkat Bahasa Jawa : AWISAN NGREMEHAKEN TIYANG SANES

 

Teks Khutbah Jumat Singkat

Awisan Ngremehaken Tiyang Sanes

Ustadz Wismanto,S.Pd.I

 

Khutbah Awal

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَ مِنْ سَيِّئَاتِ أَعْمَالِنَا مَنْ يَهْدِ اللَّهُ فَلاَ مُضِلَّ لَهُ وَمَنْ يُضْلِلْ فَلاَ هَادِىَ لَهُ, وَأَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ, اللّهُمَّ صَلِّ عَلَى نَبِيِّنَا مُحَمَّدٍ وَعَلَى آلِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ, يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ  

Jamah jumah rahimakumullah

Sumangga tansah munjuk syukur dhumateng Allah Ta’ala ingkang tansah paring rahmat taufik sarta hidayah dhumateng kula lan panjenengan. Shalawat ugi salam mugi tansah katetepaken dhumateng nabi Muhammad SAW ingkang tansah kita tengga syafaatipun wonten ing dinten kiyamah.

Jamah jumah rahimakumullah

Wonten kesempatan khutbah siang punika khatib wasiat sumangga tansah ningkataken taqwa dhumateng Allah kanti nindakaken dhawuhipun lan nebihi awisanipun. Mugi kanti taqwa Allah tansah paring kamulyan fiddunya wal akhirah. Amiin.

Jamah jumah rahimakumullah

Allah SWT nitahaken manungsa wonten ing alam donya punika kawiwitan saking Adam a.s lan Hawa banjur nglahiraken (miyosaken) putra wayah ingkang kathah. Sedaya putra wayahipun Adam sumebar wonten sak lumahipun bumi kanthi anggadahi bakat ugi bentuk fisik ingkang benten- benten. Saklajengipun putra wayahipun Adam a.s tansaya tambah kathah ngantos dados mapinten- pinten suku lan bangsa- bangsa. Ngendika Allah SWT:

  يٰٓاَيُّهَا النَّاسُ اِنَّا خَلَقْنٰكُمْ مِّنْ ذَكَرٍ وَّاُنْثٰى وَجَعَلْنٰكُمْ شُعُوْبًا وَّقَبَاۤىِٕلَ لِتَعَارَفُوْاۚ اِنَّ اَكْرَمَكُمْ عِنْدَ اللّٰهِ اَتْقٰىكُمْۗ اِنَّ اللّٰهَ عَلِيْمٌ خَبِيْرٌ

“He para manungsa sanyatane Ingsun wus nitahake sira kabeh saka wong lanang lan wong wadon, ingsun banjur andadekake sira kabeh dadi pirang- pirang bangsa lan turunan supaya sira pada wewanuhan, satemene wong kang paling mulya ang antarane sira kabeh yaiku wong kang taqwa marang Allah, satemene Allah iku Maha Uninga tur Maha Waspada”. (QS. Al- Hujurat:13).

Syaikh Abdurrahman bin Nashir as-Sa'di, pakar tafsir abad 14 H ngendika: “Anane manungsa kang dadi pirang- pirang suku lan bangsa kang akeh, iku nduweni tujuan kang becik. Yaiku supaya pada wewanuhan banjur nduweni rasa mbutuhake marang liyane nuli pada seneng tulung tinulungan ang antarane siji lan sijine. Wong kang paling minulya mungguhing Allah iku dudu kang paling akeh kerabate, duwur derajat sosiale, utawa akeh bandhane, ananging wong kang paling taat marang Allah lan paling becik tumindhake”. (Taisirul Karimir Rahman).

Jamah jumah rahimakumullah

Saking ayat punika saget dipun pendet piwucal utama kagem paugeram gesang kula lan panjenegan ing saben dintenipun. Piwucal utama punika ing antawisipun:

1.     Manungsa punika derajatipun sami, boten wonten bentenipun.

Ngendika Rasulullah SAW:

أَلاَ لاَ فَضْلَ لِعَرَبِيٍّ عَلَى عَجَمِيٍّ وَلاَ عَجَمِيٍّ عَلَى عَرَبِيٍّ وَلاَ أَحْمَرَ عَلَى أَسْوَدَ وَلاَ أَسْوَدَ عَلَى أَحْمَرَ إِلاَّ بِالتَّقْوَى

“Mangertia sira menawa wong arab iku ora luwih utama tinimbang wong ‘ajam (non ‘arab), lan uga wong ‘ajam (non arab) iku ora luwih utama tinimbang wong arab. Lan wong kang kulite abang iku ora luwih utama tinimbang kang kulite ireng utawa wong kang kulite ireng ugo ora luwih utama tinimbang wong kang kulite abang kajaba kanthi sebab ketakwaan”. (HR. Ahmad: 411).

Saking hadits punika Rasulullah paring piwucal bilih sedaya manungsa derajatipun sami. Boten wonten bentenipun tiyang arab kelawan tiyang afrika, tiyang eropa utawi tiyang asia, sedaya punika putra wayahipun nabi Adam ingkang kagungan derajat sami. Warna kulit, papan geografis punika boten dados sebab minulya lan utama, ingkang dados sebab minulya punika taqwanipun. Sahingga wonten pundi negarinipun utawi kadosnapa warna kulitipun sauger taqwa dhumateng Allah kanthi miderek dawuhipun lan nebihi awisanipun mila tiyang kasebat badhe pikantuk derajat ingkang minulya.

2.     Awisan sombong lan ngremehaken tiyang sanes.

Piwucal ingkang saklajengipun saking ayat ing nginggil inggih punika awisan sombong lan ngremehaken tiyang sanes. Kadhangkala kula lan panjenengan manggihi tiyang ingkang rumangsa langkung sae tinimbang sanesipun, amargi status sosial, amargi bandha utawi amargi jabatan. Kadhangkala wonten ingkang kagungan jabatan inggil misalipun menteri, wakil menteri, utusan presiden utawi wakil rakyat banjur gumede lan sombong. Wonten ugi tiyang ingkang kagungan kawruh, ilmu pengetahuan, gelar akademik banjur sombong. Utawi kagungan bandha, usaha ekonomi ingkang sukses banjur sombong. Sejatosipun sedaya kala wau namung ujian saking Allah, sekedar titipan mboten pantes dipun sombongaken.

Ngendika Rasulullah SAW:

لاَ يَدْخُلُ الْجَنَّةَ مَنْ كَانَ فِى قَلْبِهِ مِثْقَالُ ذَرَّةٍ مِنْ كِبْرٍ

“Ora bakal bisa mlebu surga sapa kang ana atine nduweni sifat sombong sanadyan mung sak dzarah” (HR. Muslim: 2749)

Jamah jumah rahimakumullah

Kanthi punika sampun sakmestinipun kula lan panjenengan tansah tawadhu’ lan njagi adab ugi sopan santun. Kagungan status sosial ingkang inggil utawi kagungan bandha ingkang katah tetep wajib tawadhu. Mboten pareng ngremehaken tiyang sanes sanadyan sinten kemawon, petani misalipun, utawi pedagang kaki lima, utawi bakul es teh ingkang nembe kemawon viral. Sedaya manungsa sanadyan profesinipun benten- benten ananging derajatipun namung sami mungguhipun Allah.

Akhiripun namung dhumateng Allah SWT kula lan panjenegan nyenyuwun mugi Allah tansah kepareng paring pitedhah lan kamulyan panggesangan wonten ing dunya ngantos dumugi akhirat. Aamiin.

أَقُوْلُ قَوْلِي هَذَا وَاسْتَغْفِرُ اللهَ لِي وَلَكُمْ وَلِسَائِرِ المُسْلِمِيْنَ إِنَّهُ هُوَ السَمِيْعُ العَلِيْمُ

Khutbah Kaping Kalih

الحَمْدُ للهِ رَبِّ العَالمِيْنَ وَالصَّلاَةُ وَالسَّلاَمُ عَلَى أَشْرَافِ الأَنْبِيَاءِ وَالمرْسَلِيْنَ نَبِيِّنَا مُحَمَّدٍ وَعَلَى آلِهِ وَصَحْبِهِ

أَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ، يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

اَللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ وَعَلَى آلِهِ وَأَصْحَابِهِ وَقَرَابَتِهِ وَأَزْوَاجِهِ وَذُرِّيَّاتِهِ أَجْمَعِيْنَ

اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ

اللَّهُمَّ أَنْتَ اللَّهُ لَا إِلَهَ إِلَّا أَنْتَ. أَنْتَ الْغَنِيُّ وَنَحْنُ الْفُقَرَاءُ

اللَّهُمَّ إِنَّا نَسْأَلُكَ الهُدَى وَالتُّقَى وَالعَفَافَ وَالغِنَى

رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ

Untuk membaca atau mencetak file khutbah jumat   singkat berbahasa Jawa ini dalam bentuk PDF silahkan download melalui tautan berikut ini :

                                                                                        DOWNLOAD