Teks Khutbah Idul Fitri 1446 H Bahasa Jawa : NGGAYUH KAMULYAN DUNYA LAN AKHIRAT

 

Teks Khutbah Idul Fitri 1446 H Bahasa Jawa

Nggayuh Kamulyan

Dunya Lan Akhirat

Ustadz Wismanto,S.Pd.I

اللَّه أَكْبَرُ  اللَّه أَكْبَرُ اَللهُ أَكْبَرُ.  لاَ إِلهَ إِلاَّ اللهُ. وَاللهُ أَكْبَرُ. اللهُ أَكْبَرُ وَللهِ الْحَمْدُ

الْحَمْدُ لِلَّهِ الَّذِي هَدَانَا لِهَذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ

أَشْهَدُ أَنْ لاَ إِلَهَ إِلاَّاللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ

اَللَّهُمّ صَلِّ وَسَلِّمْ عَلى مُحَمّدٍ وَعَلى آلِهِ وأَصْحَابِهِ وَمَنْ تَبِعَهُمْ 

بِإِحْسَانٍ إِلَى يَوْمِ الدّيْن

فَيَا أَيُّهَا الْحَاضِرُوْنَ. اِتَّقُوا اللهَ حَقَّ تُقَاتِهِ فَقَالَ اللهُ تَعَالَى

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

Maa’syiral muslimin rahimakumullah, Puji syukur mugi tansah kunjuk dhumateng Allah Ta’ala ingkang tansah paring rahmat, taufiq sarta hidayah dhumateng kula lan panjenengan satemah ing dinten idul fitri enjang punika punika kula lan panjenengan saget pinanggih kahthi suka bahagia nir ing sambekala.

Shalawat ugi salam mugi tansah katetepaken dhumateng nabi agung Muhammad SAW ingkang tansah kula lan panjenengan tengga syafaatipun wonten ing dinten akhir. Amin.

Maa’syiral muslimin rahimakumullah, Wonten mimbar khutbah idul fitri enjang punika khatib wasiat sumangga tansah ningkataken taqwa dhumateng Allah kanti nindakaken dhawuhipun lan nebihi sedaya awisanipun. Mugi kanti taqwa Allah SWT tansah paring kamulyan panggesangan wiwit ing donya ngantos dumugi akhirat. Aamiin.

اللَّه أَكْبَرُ  اللَّه أَكْبَرُ اَللهُ أَكْبَرُ.  لاَ إِلهَ إِلاَّ اللهُ. وَاللهُ أَكْبَرُ. اللهُ أَكْبَرُ وَللهِ الْحَمْدُ

Maa’syiral muslimin rahimakumullah, Alhamdulillah enjang punika kula lan panjenegan saget pinanggih dinten riyaya, dinten fitri lan dinten minula. Awit rahmatipun Allah SWT kula lan panjenegan saget nglampahi sedaya amalan ing wulan Ramadhan ngantos paripurna. Mila pinangka wujud syukur dhumateng Allah sumangga wonten dinten fitri punika kula lan panjenegan ngatah- ngatahi waosan takbir tahlil lan tahmid.

اللَّه أَكْبَرُ  اللَّه أَكْبَرُ اَللهُ أَكْبَرُ.  لاَ إِلهَ إِلاَّ اللهُ. وَاللهُ أَكْبَرُ. اللهُ أَكْبَرُ وَللهِ الْحَمْدُ

Maa’syiral muslimin rahimakumullah, Ramadahan sampun paripurna, Ramadhan sampun nilaraken kula lan panjenengan kanthi mbeta sedaya rahmat barakah lan magfirahipun. Anaging, sanadyan Ramadhan sampun paripurna, sejatosipun tarbiyah lan piwucal Ramadhan tasih saget dipun pendet ngantos saklami- laminipun. Ramadhan paring tarbiyah utawi piwucal dhumateng kula lan panjenegan supados saget dados insan ingkang minulya. Ramadhan ngajak sedaya kaum mukminin supas sareng- sareng nggayuh kamulyan panggesanganipun ing dunya lan akhirat. Mila kagem mendet piwucal Ramadhan, wonten ing mimbar khutbah idul fitri enjang punika kepareng badhe khatib aturaken 3 tanda tiyang ingkang badhe pinaringan kamulyan panggesangan ing dunya lan akhirat.

1.     Tansah yakin bilih Allah Maha Mirsani.

Maa’syiral muslimin rahimakumullah, kenging punapa tiyang ingkang siyam saget meper dahar lan ngunjuk sanadyan boten wonten ingkang ngawasi??, temtu jawabanipun amargi pitados lan yakin bilih Allah tansah Maha Mirsani.

Kenging punapa tiyang ingkang siyam punika saget meper lisan lan badanipun saking tumindhak awon sanadyan boten wonten tiyang ingkang ngawasi?? Temtu jawabanipun ugi amargi yakin Allah Maha Mirsani.

Artosipun Ramadhan paring piwucal bilih sanadyan mboten wonten tiyang ingkang ngawasi lan mirsani ananging sejatosipun Allah SWT tansah Ngawasi lan Mirsani kula lan panjenegan. Ngendika Allah:

وَهُوَ مَعَكُمْ أَيْنَ مَا كُنتُمْ ۚ وَٱللَّهُ بِمَا تَعْمَلُونَ بَصِيرٌ

“Lan Panjenengane Allah tansah anyartani sira kabeh ana ing endi wae papanira. Lan Allah iku tansah Mriksani samubarang kang pada sira tindhakake” (QS; Al Hadid:4).

Maa’syiral muslimin rahimakumullah, Allah punika tansah Mirsani ing bab punapa kemawon ingkang kula lan panjenegan tindhakaken. Mila tumrap tiyang ingkang akal budinipun normal, punapa boten lingsem menawi tumindhak awon utawi ngendikan awon ingmangka Allah Ngawasi piyambakipun.

Kapitadosan bilih Allah Maha Mirsani ing bab punapa kemawon, estu saget dados jalaran tiyang punika ngatos- ngatos anggenipun tumindhak wonten saben dintenipun. Tiyang ingkang yakin bilih Allah tansah Mirsani temtunipun boten badhe wantun tumindhak awon utawi nglampahi maksiat.

Mila kapitadosan punika estu saget dados jalaran tiyang punika pinaringan kamulyan panggesangan wonten ing dunya ngantos dumugi akhirat. Perkawis punika jumbuh kaliyan pangandikanipun Rasulullah:

أَنْ تَعْبُدَ اللهَ كَأَنَّكَ تَرَاهُ، فَإِنْ لَمْ تَكُنْ تَرَاهُ فَإِنَّهُ يَرَاكَ

“(Ihsan: derajat iman kang paling duwur) yaiku sira manembah marang Allah kaya sira sumurup/ mirsani marang Allah, ananging menawa sira durung bisa, mula mangertia sejatine Allah iku tansah Mirsani marang sira”. (HR.Muslim).

2.     Tansah saget koreksi diri/ mawas diri

Maa’syiral muslimin rahimakumullah, Ramadhan paring piwucal bilih sejatosipun kula lan panjenegan punika makhluk ingkang ringkih, boten dahar kirang langkung 8 jam kemawon sampun lemes boten kagungan daya. Artosipun Ramadhan ngajak kula lan panjenegan koreksi diri/ mawas diri supados ampun dados tiyang sombong, gumede, adigang adigung adiguna. Kedah dipun emut, kula lan panjenegan namung makhluk alit ingkang ringkih, sedaya sarwa winates. Sejatosipun kula lan panjenegan punika sanes sinten- sinten lan boten saget punapa- punapa, kejawi menawi dipun paring pitulungan dening Allah SWT.

Sepisan malih, boten perlu rumaos sombong amargi boten wonten ingkang saget dipun sombongaken.

• Badan/ fisik punika namung titipan.
• Akal fikiran ugi namung titipan.
• Bandha napa malih, sedaya namung titipan.

Mila punapa pantes tiyang ingkang namung nampi titipan kok malah sombong?

Amirul mukminin Umar bin Khatab nate paring wejangan:

حَاسِبُوا أَنْفُسَكُمْ قَبْلَ أَنْ تُحَاسَبُوا

“sira pada hisaben badanira (pada koresia diri), sakdurunge sira dihisab (ana ing dina kiyamat).”

Tiyang ingkang saget koreksi diri estu mujudaken ciri tiyang ingkang badhe manggih kamulyan ing donya lan akhirat. Lan kosok wangsulipun tiyang ingkang boten saget koreksi diri, boten saget mawas diri mila boten saget mundak kesaenanipun, namung badhe ajeg kemawon ngantos sak lami- laminipun. Mila tiyang ingkang boten saget koreksi diri punika ciri tiyang ingkang sampun gagal gesangipun.

3.     Perduli tumrap tiyang sanes.

Maa’syiral muslimin rahimakumullah, Wonten ing wulan Ramadhan rasulullah paring piwucal supados kula lan panjenegan remen sedekah, remen berbagi takjil, lan remen caos pambiyantu dumateng tiyang sanes. Artosipun rasulullah paring piwucal dhumateng sedaya umatipun kadospundi sifat, perilaku lan tindhak lampah tiyang muslim punika. Islam punika sanes sekedar ucapan lisan utawi identitas KTP, ananging kedah dipun praktekan wonten ing tataran panggesangan saben dinten. Ngendika rasulullah:

خَيْرُ النَّاسِ أَنْفَعُهُمْ لِلنَّاسِ

“Manungsa sing paling becik yaiku kang paling migunani tumrap wong liya”. (HR. At- Thabrani).

Maa’syiral muslimin rahimakumullah, Allah punika mbiji kamulyan tiyang saking perilaku perduli lan migunaninipun tumrap manungsa sanes. Artosipun tansaya perduli lan migunani tumrap tiyang sanes mila mungguhipun Allah tiyang punika tansaya inggil derajat kamulyanipun. Punapa kemawon ingkang Allah titipaken dhumateng kula lan panjenegan kedahipun dipun ginaaken kagem caos manfaat tumrap tiyang sanes. Allah boten mirsani kadosnapa penampilan kula lan panjenegan utawi sepinten bandha kula lan panjenegan, anaging ingkang dipun pirsani sepinten anggen kula lan panjenegan saget caos manfaat tumrap tiyang sanes.

Maa’syiral muslimin rahimakumullah, Wonten ing surat Al- Maun Allah nate ngemutaken lan paring ancaman dhumateng tiyang- tiyang ingkang boten kagungan raos perduli tumrap tiyang sanes. Tiyang ingkang boten kagungan manah boten kagungan perasaan mboten nate prihatin lan menggalih nasibipun tiyang sanes. Allah ngendika:

اَرَءَيْتَ الَّذِيْ يُكَذِّبُ بِالدِّيْنِۗ ۝١

“Apa sira Muhammad wus weruh marang wong kan maido agama?.

فَذٰلِكَ الَّذِيْ يَدُعُّ الْيَتِيْمَۙ ۝٢

“Yaiku wong kang ora mikir marang anak yatim”

وَلَا يَحُضُّ عَلٰى طَعَامِ الْمِسْكِيْنِۗ ۝٣

“Lan deweke ora gelem (perduli) aweh pangan marang wong miskin”.

Maa’syiral muslimin rahimakumullah Wonten ayat punika Allah paring teguran lan ancaman, bilih tiyang ingkang boten perduli tumrap nasibipun tiyang sanes punika kalebet tiyang ingkang ingkar dhateng agami. Sanadyan ngakunipun muslim ananging sejatosipun namung ngapusi, tiyang kasebat dereng layak lan dereng pantes dipun sebat muslim.

Mila boten wonten gunanipun kula lan panjenegan kagungan jabatan inggil, kagungan gelar akademik ingkang thari- tharik, kagungan bandha ingkang katah melimpah, ananging boten kagungan ati, boten kagungan perasaan, boten kagungan raos perduli dhateng tiyang fakir lan miskin.

اللَّه أَكْبَرُ  اللَّه أَكْبَرُ اَللهُ أَكْبَرُ.  لاَ إِلهَ إِلاَّ اللهُ. وَاللهُ أَكْبَرُ. اللهُ أَكْبَرُ وَللهِ الْحَمْدُ

Maa’syiral muslimin rahimakumullah, Cekak aosipun wonten mimbar khutbah idul fitri enjang punika kula ngajak dhumateng badan kula piyambak lan sedaya jamaah, sumangga sesarengan nggayuh kamulyan panggesangan dunya lan akhirat kanthi:

(1). Tansah yakin bilih Allah Maha Mirsani kula lan panjenegan, (2). Tansah remen koreksi diri lan mawas diri (3). Tansah remen perduli dhateng tiyang sanes.

Akhiripun sumangga kula lan panjengan tansah ndedonga dumatheng Allah, mugi Allah Ta’ala tansah andadosaken kula lan panjenegan tiyang- tiyang ingkang manggih kamulyan panggesangan fiddunya wal akhirah.

 

اَلْحَمْدُ لِلَّهِ رَبِّ الْعَالَمِيْنَ. حَمْدًا يُوَافِيْ نِعَمَهُ وَيُكَافِئُ مَزِيْدَهُ

يَا رَبَّنَا لَكَ الْحَمْدُ كَمَا يَنْبَغِيْ لِجَلاَلِ وَجْهِكَ الْكَرِيْمِ وَعَظِيْمِ سُلْطَانِكَ

. اَللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ. وَبَارِكْ عَلَى مُحَمَّدٍ وَعَلَى آلِ مُحَمَّدٍ كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ

اللّهُمَّ اغْفِرْ لِلْمُسْلِمِيْنَ وَالمـُسْلِمَاتِ وَالمُؤْمِنِيْنَ وَالمـُؤْمِنَاتِ الأَحْيَاءِ مِنْهُمْ وَالأَمْوَاتِ اِنَّكَ سَمِيْعٌ قَرِيْبٌ مُجِيْبُ الدَّعْوَاتِ فيَا قَاضِيَ الحَاجَاتِ.

اللّهُمَّ اِنَّا نَسْأَلُكَ سَلاَمَةً فِى الدِّيْنِ وَعَافِيَةً فِى الْجَسَدِ وَزِيَادَةً فِى الْعِلْمِ وَبَرَكَةً فِى الرِّزْقِ وَتَوْبَةً قَبْلَ الْمَوْتِ وَرَحْمَةً عِنْدَ الْمَوْتِ وَمَغْفِرَةً بَعْدَ الْمَوْتِ بِرَحْمَتِكَ يَا أَرْحَمَ الرَّاحِمِيْنَ.

رَبَّنَا لَا تُزِغْ قُلُوبَنَا بَعْدَ إِذْ هَدَيْتَنَا وَهَبْ لَنَا مِن لَّدُنكَ رَحْمَةً ۚ إِنَّكَ أَنتَ ٱلْوَهَّابُ.

رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا.

رَبَّنَا تَقَبَّلْ مِنَّا إِنَّكَ أَنتَ السَّمِيعُ الْعَلِيمُ

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ

سُبْحَانَ رَبِّكَ رَبِّ الْعِزَّةِ عَمَّا يَصِفُونَ  وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ

 

Untuk membaca atau mencetak file khutbah Idul Fitri  berbahasa Jawa ini dalam bentuk PDF silahkan download melalui tautan berikut ini :

DOWNLOAD