Teks Khutbah Jumat Singkat Bahasa Jawa : NJAGI PASRAWUNGAN

 

Teks Khutbah Jumat Singkat

Njagi Pasrawungan

Ustadz Wismanto,S.Pd.I

 

Khutbah Awal

إِنَّ الْحَمْدَ لِلَّهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَعُوذُ بِاللهِ مِنْ شُرُورِ أَنْفُسِنَا وَ مِنْ سَيِّئَاتِ أَعْمَالِنَا مَنْ يَهْدِ اللَّهُ فَلاَ مُضِلَّ لَهُ وَمَنْ يُضْلِلْ فَلاَ هَادِىَ لَهُ, وَأَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ, اللّهُمَّ صَلِّ عَلَى نَبِيِّنَا مُحَمَّدٍ وَعَلَى آلِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ, يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ  

Jamaah jumah rahimakumullah

Puji syukur tansah kunjuk dhumateng Allah Ta’ala ingkang tansah paring rahmat lan taufiq dhumateng kula lan panjenengan satemah ing siang punika kula lan panjenengan saget pinanggih wonten majelis ingkang minulya kanthi kebak ingkawilujengan. Shalawat ugi salam mugi tansah katetepaken dhumateng nabi Muhammad SAW ingkang tansah kita tengga syafaatipun wonten ing dinten akhir.

Jamaah jumah rahimakumullah

Wonten kesempatan khutbah siang punika khatib wasiat sumangga tansah ningkataken taqwa dhumateng Allah kanthi nindakaken dhawuhipun lan nebihi awisanipun. Mugi kanti taqwa Allah tansah paring kamulyan panggesangan wonten ing dunya dumugi akhirat. Amiin.

Jamaah jumah rahimakumullah

Islam paring piwucal ingkang cetha dhumateng umat manungsa kadospundi caranipun nglampahi panggesangan ingkang leres. Piwucal punika tujuanipun badhe andadosaken minulyanipun panggesangan umat manungsa wonten ing dunya lan akhirat. Salah setunggal piwucal pokok ing islam inggih punika wigatosipun kula lan panjenengan njagi pasrawungan ing masyarakat. Islam dhawuh supados sedaya umatipun tansah gesang kanthi guyup rukun lan ngawisi sedaya lampah memengsahan. Ngendika Allah SWT:

وَاعْتَصِمُوْا بِحَبْلِ اللّٰهِ جَمِيْعًا وَّلَا تَفَرَّقُوْاۖ

“Lan sira pada nyekelana kelawan taline (agamane) Allah lan aja pada pepisahan (memungsuhan)… (Ali Imran: 103).

Ing ayat punika Allah dhawuh supados kaum mukminin njagi persatuan lan pasrawungan kanthi mituhu aturanipun Allah, tansah sami- sami ngurmati, nresnani lan remen tulung- tinulungan. Allah ngawisi kula lan panjenengan pepisahan (bercerai- berai), sami- sami drengki lan memengsahan amargi saget andadosaken kacilakan ing ndalem panggesangan punika.

Wonten ayat sanes Allah SWT ngendika:

ضُرِبَتْ عَلَيْهِمْ الذِّلَّةُ أَيْنَمَا ثُقِفُوا إِلَّا بِحَبْلٍ مِنَ اللهِ وَحَبْلٍ مِنْ النَّاسِ

“Wong- wong mau ana ing ngendi wae tinemune padha digawe ashor- nistha kejaba gelem banjur cecekelan marang taline Allah lan taline (pasrawungan marang) manungsa..” (Ali- Imran 112).

Ayat kasebat paring piwucal bilih manungsa boten badhe ashor lan nistha menawi kersa njagi sesambetan kaliyan Allah inggih punika mituhu dhawuhipun Allah lan njagi sesambetan kaliyan manungsa sanes.

Jamaah jumah rahimakumullah

Njagi pasrawungan punika perkawis ingkang wigatos tumrap kula lan panjenengan kaum muslimin. Rasulullah asring ngemutaken supados kula lan panjenengan nebihi perkawis ingkang saget andadosaken risakipun pasrawungan kadosdene:

 1.     Neson utawi neng- nengan kaliyan tiyang sanes.

Ngendika Rasulullah SAW:

لَا يَحِلُّ لِمُسْلِمٍ أَنْ يَهْجُرَ أَخَاهُ فَوْقَ ثَلَاثِ لَيَالٍ يَلْتَقِيَانِ, فَيُعْرِضُ هَذَا, وَيُعْرِضُ هَذَا, وَخَيْرُهُمَا اَلَّذِي يَبْدَأُ بِالسَّلَامِ – مُتَّفَقٌ عَلَيْهِ

“Ora halal tumrap wong muslim menawa ngenengke kancane/ sedulure punjul telung wengi, nalika deweke pada ketemu sing siji mlengos rana lan sijine mlengos rene, wong sing paling becik yaiku sing miwiti ugucap salam/ sapa aruh”. (HR. Bukhari lan Muslim)

Islam punika agami ingkang indah lan ngajak sedaya umatipun dhumateng panggesangan ingkang indah lan ngremenaken. Agami ngawisi neng- nengan, neson, memengsahan lan medot tali silaturahmi. Memengsahan ngantos punjul tigang dinten punika mertandakaken tiyang kasebat mboten paham aturan agami. Memengsahan punjul tigang dinten punika akibatipun awon sanget lan saget nebihaken saking rahmatipun Allah. Mila tiyang ingkang paling minulya inggih punika ingkang saget ngawonaken egonipun lajeng miwiti akur dhumateng rencangipun.

 2.     Olok- olokan lan ngremehaken tiyang sanes

Ngendika Allah SWT:

يٰٓاَيُّهَا الَّذِيْنَ اٰمَنُوْا لَا يَسْخَرْ قَوْمٌ مِّنْ قَوْمٍ عَسٰٓى اَنْ يَّكُوْنُوْا خَيْرًا مِّنْهُمْ

“He para wong mukmin, sira aja pada moyoki sagolongan tumrap golongan liyane, mbok menowo kang dipoyoki luwih becik tinimbang golongan kang moyoki…” (QS. Al- Hujurat:11).

Wonten ayat Punika Allah ngersaaken tiyang mukmin punika tansah njagi pasrawungan lan pasederekan. Murih kasembadanipun pasrawungan ingkang sae Allah ngawisi olok- olokan ing madyanipun pasrawungan. Olok- olokan ing bab punapa kemawon punika awon. Remen ngolok- olok punika mertandaaken bilih tiyang punika dereng dewasa lan dereng mangertosi menggah piwucal agami. Mila islam ngawisi olok- olokan amargi saget andadosaken risakipun pasrawungan ing tengahipun masyarakat.

 Jamaah jumah rahimakumullah

Mila kanti punika sumangga kula lan panjenegan sedaya tansah ngupadi sae lan raketipun pasederekan, kanthi njagi adab- adab pasrawungan ing masyarakat. Mugi Allah tansah paring rahmat lan hidayah satemah kula lan panjenegan saget nglampahi pitedah ingkang minulya punika. Amiin.

أَقُوْلُ قَوْلِي هَذَا وَاسْتَغْفِرُ اللهَ لِي وَلَكُمْ وَلِسَائِرِ المُسْلِمِيْنَ إِنَّهُ هُوَ السَمِيْعُ العَلِيْمُ

Khutbah Kaping Kalih

الحَمْدُ للهِ رَبِّ العَالمِيْنَ وَالصَّلاَةُ وَالسَّلاَمُ عَلَى أَشْرَافِ الأَنْبِيَاءِ وَالمرْسَلِيْنَ نَبِيِّنَا مُحَمَّدٍ وَعَلَى آلِهِ وَصَحْبِهِ

أَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ، يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

اَللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ وَعَلَى آلِهِ وَأَصْحَابِهِ وَقَرَابَتِهِ وَأَزْوَاجِهِ وَذُرِّيَّاتِهِ أَجْمَعِيْنَ

اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ

اللَّهُمَّ أَنْتَ اللَّهُ لَا إِلَهَ إِلَّا أَنْتَ. أَنْتَ الْغَنِيُّ وَنَحْنُ الْفُقَرَاءُ

اللَّهُمَّ إِنَّا نَسْأَلُكَ الهُدَى وَالتُّقَى وَالعَفَافَ وَالغِنَى

رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ

Untuk membaca atau mencetak file khutbah jumat   singkat berbahasa Jawa ini dalam bentuk PDF silahkan download melalui tautan berikut ini :

DOWNLOAD